![]({"full":{"0":"2018\/07\/Enerji.png","1":752,"2":423,"3":false,"file":"https:\/\/novator.az\/wp-content\/uploads\/2018\/07\/Enerji.png"}})
İyulun 17-də fərman imzalayan prezident İlham Əliyev enerji resurslarından səmərəli istifadə və enerji effektivliyi sahəsində dövlət nəzarətinin həyata keçirilməsi qaydasını təsdiqləyib. Dövlət nəzarəti Energetika Nazirliyinə həvalə olunur, bu istiqamətləri əhatə edir: məcburi enerji auditinin keçirilməsi; enerji menecmenti sisteminə dair tələblərə əməl edilməsi; nəzarət subyektlərinin enerji idarəçiləri (menecerləri) təyin etməsi; istehlak olunan enerjinin hesablanması; məlumatların istehlakçılara çatdırılması və qorunması; enerji istehsalçıları üçün enerji resurslarından səmərəli istifadəyə dair müəyyən edilmiş öhdəliklərin icrası. Nazirliyin istiqamətlər üzrə yoxlamalar keçirmək, nəzarət subyektindən sənədlərin surətini (elektron sənədin nüsxəsini) tələb etmək, nəzarət istiqaməti ilə bağlı digər dövlət orqanlarından (qurumlarından) məlumat əldə etmək, nəzarət tədbirlərinin həyata keçirilməsinə mane olan halların aradan qaldırılmasını tələb etmək hüququ var.
2022-ci il iyulun 1-dən qüvvəyə minmiş “Enerji resurslarından səmərəli istifadə və enerji effektivliyi haqqında” qanuna görə, məcburi enerji auditi keçirilməli olan təsərrüfat subyektlərinin və qeyri-yaşayış binalarının siyahısı rəsmən təsdiqlənir. Məcburi enerji auditi 3 ildən bir keçirilir.
İllik enerji istehlakı 1000 ton neft ekvivalentindən çox olan təsərrüfat subyektlərində və tikinti ərazisi ən azı 10000 kvadratmetr və ya illik enerji istehlakı 250 ton neft ekvivalentindən çox olan qeyri-yaşayış binalarında enerji idarəçisi (meneceri) təyin edilməlidir.