Xarici ticarət hesabatı
Yarım illik xarici ticarət hesabatı yayılıb. Novator.az bildirir ki, Dövlət Gömrük Komitəsinin məlumatına görə, Azərbaycan 2023-cü ilin yanvar-iyun aylarında 187 ölkə ilə ticarət aparıb, ixrac 17,9 milyard dolları, idxal 8,1 milyard dolları ötüb, gömrükdən dövlət büdcəsinə 3 milyard 75,3 milyon manatdan çox vəsait ödənib.
Yanvar və iyunda 1,8 milyard, fevralda 2,6 milyard, martda 3,2 milyard, apreldə 4,8 milyard, mayda 3,5 milyard dollarlıq ixrac qeydə alınıb.
İdxal göstəriciləri belədir: yanvar – 1,4 milyard dollar, fevral və aprel – 1,2 milyard dollar, mart və iyun – 1,3 milyard dollar, may – 1,5 milyard dollar.
İxracın 90,1 faizinin neft-qaz sektoruna aid olduğu, idxalda ən böyük payın (18,6 faiz) maşın, mexanizm, elektrik aparatları, avadanlıqlar və onların hissələrini əhatə etdiyi vurğulanır.
Məlumata əsasən, ixracın 4,6 faizi MDB ölkələrinə, 67,9 faizi Avropa İttifaqı ölkələrinə, 27,5 faizi başqa ölkələrə yönəlib, idxalda MDB-nin payı 30,2 faiz, Avropa İttifaqının payı 18,8 faiz, başqa ölkələrin payı 51 faiz olub.
Ticarət dövriyyəsində və ixracda əsas tərəfdaş kimi İtaliya, idxalda əsas tərəfdaş kimi Rusiya göstərilir.
