Mühacir dövlətdən 4500 avro uddu
İyulun 13-də Avropa İnsan Hüquqları Məhkəməsi Reportyorların Azadlıq və Təhlükəsizlik İnstitutunun rəhbəri Emin Hüseynovun şikayəti üzrə qərar elan edib.
2014-cü ildə Azərbaycanda Emin Hüseynova qanunsuz sahibkarlıq, vergi ödəməkdən yayınma, vəzifə səlahiyyətlərindən sui-istifadə ittihamları ilə cinayət işi qaldırılıb. O, İsveçrənin Bakıdakı səfirliyinə sığınıb, 2015-ci ildə həmin ölkəyə aparılıb.
Aihmaz.org-un məlumatına görə, Emin Hüseynov Avropa Məhkəməsinə şikayətində cinayət təqibinə məruz qalmasının jurnalist və hüquq müdafiəçisi fəaliyyəti ilə bağlı olduğunu vurğulayıb, Azərbaycan vətəndaşlığından imtinaya məcbur edildiyini, Avropa İnsan Hüquqları Konvensiyası ilə qorunan bir çox hüququnun pozulduğunu bildirib.
Məhkəmə jurnalistin şəxsi həyata hörmət hüququnun pozulduğu, həmçinin Azərbaycan dövlətinin fərdi şikayət hüququ və məhkəmə işlərinin araşdırılması üzrə öhdəliklərinə əməl etmədiyi qənaətinə gəlib. Qərara görə, dövlət ərizəçiyə 4500 avro təzminat ödəməlidir.
Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarətə məsuldur. Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin təsir dairəsindədir.
