Yarım ilin cinayətləri
Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyası bildirir ki, 2023-cü ilin yanvar-iyun aylarında 5881 cinayət faktı aşkarlanıb, onların 2048-i narkotik vasitələrin satışı, 3638-i narkotik vasitələrin əldə edilib saxlanması, 166-sı narkotik xassəli bitkilərin kultivasiya edilməsi, 29-u başqa cinayətlərdir.
Qanunsuz dövriyyədən müsadirə olunmuş narkotik vasitələrin və psixotrop maddələrin həcmi 4 ton 623 kiloqramdan çox göstərilir.
Hesabata görə, yarım ildə 4277 nəfər cinayət məsuliyyətinə cəlb edilib.
Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasına baş nazirin müavini Əli Əhmədov sədrlik edir. Daxili işlər naziri Vilayət Eyvazovun sədr müavini olduğu qurumda Baş Prokurorluğun, Prezident Administrasiyasının, Milli Məclisin, Nazirlər Kabinetinin, mərkəzi və yerli icra hakimiyyəti orqanlarının rəsmiləri və başqaları yer alır.
