Şövkət Mirziyayev üçüncü dəfə prezident seçilir
Özbəkistanda iyulun 9-da keçirilmiş növbədənkənar prezident seçkisinin ilkin nəticələri açıqlanıb. Novator.az bildirir ki, hesabata görə, dörd iddiaçının yer aldığı seçkidə dövlət başçısı, Liberal Demokrat Partiyasının namizədi Şövkət Mirziyayev 87,05 faiz səslə önə çıxıb.
Seçki yarışına Xalq Demokrat Partiyasının namizədi Uluqbəy İnayətov, Sosial Demokrat Partiyasının namizədi Robahan Mahmudova, Ekologiya Partiyasının namizədi Əbdüşükür Həmzəyev də qatılmışdılar.
Növbədənkənar prezident seçkisinə mayın 8-də qərar verilib. Bu, konstitusiyaya dəyişikliklər referendumunun nəticələrindən irəli gəlir. Aprelin 30-da keçirilmiş referendumda rəsmiləşən əsas yeniliklərdən biri prezidentin səlahiyyət müddətinin 5 ildən 7 ilə qaldırılması, indiki dövlət başçısına yenidən seçilmək imkanı yaradılmasıdır.
1957-ci il təvəllüdlü Şövkət Mirziyayev 2003-cı il dekabrın 12-dən baş nazir olub, 2016-cı il sentyabrın 8-dən prezident səlahiyyətlərini icra edib, dekabrın 4-də prezident seçilib, 2021-ci il oktyabrın 24-də keçirilmiş prezident seçkisində də qalib gəlib.
