Daxili İşlər Nazirliyinin sözçüsü pensiyaya çıxdı
Polis polkovniki Ehsan Zahidov pensiyaya göndərilib. İyulun 10-da yayılan xəbərə görə, daxili işlər naziri Vilayət Eyvazov əmri Ehsan Zahidovun xidmətdə olmanın son yaş həddinə çatması ilə əsaslandırıb.
1963-cü il təvəllüdlü Ehsan Zahidov Bakı Dövlət Universitetinin jurnalistika fakültəsini bitirib, həmçinin Daxili İşlər Nazirliyinin Polis Akademiyasında hüquqşünas ixtisası üzrə ali təhsil alıb.
1992-ci ildən daxili işlər orqanlarında çalışan Ehsan Zahidov Daxili İşlər Nazirliyinin mətbuat xidmətinin şöbə müdiri olub, 2010-cu ildən mətbuat xidmətinin rəis müavini vəzifəsini tutub, 2017-ci il fevralın 1-dən mətbuat xidmətinə rəislik edib.
Daxili işlər orqanlarının polkovnik xüsusi rütbəli əməkdaşı 55 yaşadək daxili işlər orqanlarında xidmət edə bilər. Bu müddətin maksimum 5 il artırılması mümkündür.
