Xəbərlər yüklənir ...
Avropa İnsan Hüquqları Məhkəməsi iyulun 6-da Azərbaycandan şikayətlər üzrə qərar və qərardadlar elan edib.
Şamil Quliyev Avropa Məhkəməsinə prokurorluq orqanlarından qanunsuz xaric edilməsi iddiası ilə üz tutub. Aihmaz.org xəbər verir ki, məhkəmə ərizəçinin Avropa İnsan Hüquqları Konvensiyası ilə qorunan şəxsi həyata hörmət hüququnun pozulduğu qənaətinə gəlib. Qərara görə, Azərbaycan dövləti Şamil Quliyevə 7 min avro təzminat ödəməlidir.
Lətifə Ağayeva, Zaur Camalxanov, Elvin Ağayev, Əzim Hüseynov və Müşfiq Quliyev şikayətlərində məhkəməyə qədər həbslərini azadlıq və toxunulmazlıq hüququna müdaxilə sayıblar. Dövlətlə anlaşmaya görə, Lətifə Ağayeva və Əzim Hüseynovun hər birinə 4500 avro, Zaur Camalxanov, Elvin Ağayev və Müşfiq Quliyevin hər birinə 3500 avro təzminat veriləcək.
Mülkiyyət hüququnun pozuntusundan şikayətçi olmuş Nazim Nəsirov dövlətdən 3600 avro, Əlağa Mirzəyev 2100 avro təzminat alacaq.
Eyni iddia ilə ərizə vermiş Maşallah Hüseynov, Şükran Hüseynov, Məharət Qəhrəmanov və Yengibar Səfərovun hər birinə 3850 avro, Yüksəl Babayevə 3250 avro, Altay Ələsgərova 850 avro təzminat ödənməlidir.
Ərəstun Baxşəliyev məhkəməyə inzibati həbsinin qanunsuzluğu iddiası ilə üz tutub. Dövlət ona 800 avro, vəkilinə 450 avro ödəməyə boyun olub.
Jurnalist, hüquq müdafiəçisi Elçin Məmməd məhkəməyə qədər həbs edilməsinin qanunsuz olduğunu iddia edib. Ərizəçi 3500 avro təzminat alacaq.
Hərəkət azadlığı və şəxsi həyata hörmət hüququnun pozuntusu iddiası qaldıran Rauf Quliyevə 6000 avro təzminat ödənəcək.
Səyahət qadağası ilə üzləşmiş Cavidan Abdullazadə də dövlətdən 6000 avro təzminat alacaq.
Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarətə məsuldur. Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin təsir dairəsindədir.