Sülh sazişi: yeni razılaşma var
Xarici İşlər Nazirliyinin məlumatına görə, nazir Ceyhun Bayramov iyunun 27-dən 29-dək ABŞ-ın Virciniya ştatının Arlinqton şəhərində ermənistanlı həmkarı Ararat Mirzoyanla danışıqlar aparıb: “Paytaxt Vaşinqtonda nazirlər ABŞ-ın dövlət katibi Entoni Blinken və prezidentin milli təhlükəsizlik üzrə müşaviri Ceyk Sallivanla görüşüblər. Nümayəndə heyətləri sülh və dövlətlərarası münasibətlərin qurulması sazişində tərəqqiyə nail olub, layihənin əlavə maddələri üzrə razılıq əldə edib, qarşılıqlı anlaşmaya doğru addım atıb, bəzi əsas məsələlərdə işi davam etdirməyə razılaşıb”.
Ceyhun Bayramovla Ararat Mirzoyanın Arlinqtonda ilk danışıqları 1-4 mayda keçirilmişdi.
Ermənistan 1988-1994-cü illərin təcavüzündə Azərbaycanın altıda birini işğal edib, Yuxarı Qarabağ bölgəsində separatçı rejim qurulub.
2020-ci il sentyabrın 27-dən noyabrın 10-dək Azərbaycanın apardığı hərbi əməliyyatlarda və savaşdan sonrakı danışıqlarla Cəbrayıl, Füzuli, Zəngilan, Qubadlı, Ağdam, Kəlbəcər, Laçın rayonları tam, Şuşa, Xocavənd, Xocalı rayonları və keçmiş Ağdərə rayonu qismən azad olunub.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi işğalçı rejimin əlindədir. Həmin ərazilərə və bölgədən Ermənistana gedən Laçın yoluna Rusiyanın hərbi kontingenti nəzarət edir.
Sədərək rayonunun 1, Qazax rayonunun 7 kəndi də işğalda qalır.
Azərbaycanın Ermənistana təqdim etdiyi sülh planında ərazi bütövlüyünün qarşılıqlı tanınması, ərazi iddiasından çəkinmək, güc tətbiq etməmək və güc tətbiq etməklə hədələməmək, dövlət sərhədlərinin müəyyən edilməsi və kommunikasiyaların açılması prinsipləri əks olunub.
