Keçmiş hökumət qayıdır
Yunanıstanda iyunun 25-də keçirilmiş parlament seçkisinin ilkin nəticələri açıqlanıb. Novator.az bildirir ki, rəsmi hesabata görə, Kiriakos Mitsotakisin Yeni Demokratiya Partiyası 158 mandatla önə çıxaraq hökumət qurmaq hüququ əldə edir.
300 yerlik qanunverici orqana SİRİZA Partiyası, PASOK-KİNAL Hərəkatı, Kommunist Partiyası və daha dörd partiya da düşür.
2019-cu il iyulun 8-dən ölkəyə Kiriakos Mitsotakis baş nazirlik edib. 2023-cü il mayın 21-də keçirilmiş parlament seçkisində 300 yerlik qanunverici orqana beş siyasi qüvvə mandat alıb. Onların heç biri hökumət qurmaq üçün gərəkli 151 mandata yetişməyib. Koalisiya danışıqları uğursuz olduğu üçün müvəqqəti hökumət qurulub, iyunun 25-nə yeni parlament seçkisi təyin edilib.
1968-ci il təvəllüdlü Kiriakos Mitsotakis ABŞ-da Harvard Universitetinin sosial elmlər fakültəsini bitirib, Stenford Universitetində beynəlxalq münasibətlər üzrə, Harvard Biznes Məktəbində idarəçilik üzrə magistr təhsili alıb.
2004-cü ildən parlamentdə təmsil olunub, 2013-2015-ci illərdə inzibati islahatlar və elektron idarəçilik naziri postunu tutub.
Yeni Demokratiya Partiyasına 2016-cı ildən liderlik edir.
