“Vaqner” geri çəkilir
Rusiyada qiyama qalxmış “Vaqner” özəl hərbi birləşməsi geri çəkilir. Hərbi birliyin sahibi Yevgeni Priqojin iyunun 24-ü axşam bəyan edib ki, qan tökülməsini istəmədiyi üçün döyüşçülərinə daimi yerləşmə məntəqələrinə dönmək əmri verib.
Məlumata görə, Rusiya hakimiyyəti Belarus prezidenti Aleksandr Lukaşenkonun vasitəçiliyi ilə aparılmış danışıqlarda Yevgeni Priqojinə və döyüşçülərinə təhlükəsizlik vəd edib.
“Vaqner” Ukraynada aparılan işğalçı müharibədə döyüşür. Qrup ilk dəfə 2014-cü ildə Rusiya Krımı ilhaq edərkən meydana çıxıb.
İyunun 24-nə keçən gecə Yevgeni Priqojin Rusiya Müdafiə Nazirliyini “Vaqner”in düşərgəsini raket atəşinə tutmaqda ittiham edərək döyüşçülərini qiyama qaldırıb. Ukrayna cəbhəsindən geri çəkilən “Vaqner”çilər Rusiyanın Rostov və Voronej vilayətlərində bir çox məntəqəni nəzarətə götürüb paytaxt Moskvaya yön alıblar.
Rusiya Baş Prokurorluğu Yevgeni Priqojinə hərbi qiyam təşkili ittihamı ilə cinayət işi açıldığını bəyan edib. Prezident Vladimir Putin televiziya ilə xalqa müraciətində “Vaqner”in üsyanını dövlətə xəyanət adlandırıb və sərt tədbirlər görüləcəyini deyib.
Vladimir Putinlə yaxın əlaqələri olan iş adamı Yevgeni Priqojinlə Rusiyanın rəsmi hərbi komandanlığı, əsas da müdafiə naziri Sergey Şoyqu arasında kəskin münaqişə var.
