Dövlət satınalmaları: yeni qanun gəlir
Milli Məclisin 24 iyun iclasında “Dövlət satınalmaları haqqında” qanun layihəsi ilk oxunuşdan keçib. Layihəyə görə, qanun ölkədə dövlət satınalmalarının iqtisadi, hüquqi və təşkilati əsaslarını və qaydalarını müəyyən edir, satınalan təşkilatların keçirdiyi bütün satınalmalara şamil edilir. Bir çox mal, iş və xidmətin satın alınması, o cümlədən yalnız dövlət orqanının (qurumunun) və ya təbii inhisar subyektlərinin təqdim etdiyi və qiymətlərini (tariflərini) dövlət tənzimləyən (müəyyən edən) mallar, işlər və ya xidmətlər; kreditlərin alınması; qiymətli kağızlar, çeklər və xarici valyuta və bunlarla bağlı xidmətlər; müdafiə və ya dövlət təhlükəsizlik ehtiyacları üçün alınan mallar, işlər və ya xidmətlər istisnadır.
Satınalma bir çox mərhələdən, o cümlədən satınalma planının hazırlanması və ehtimal olunan qiymətin müəyyənləşdirilməsi; satınalma komissiyasının formalaşdırılması; şərtlər toplusunun hazırlanması; təkliflərin cəlb edilməsi barədə elan verilməsi (dəvət göndərilməsi); təkliflərin qəbulu və açılması; təkliflərin qiymətləndirilməsi; satınalmanın nəticələri haqqında yekun protokolun hazırlanması və təsdiq olunması məqsədilə nəzarət orqanına təqdim edilməsi kimi mərhələlərdən keçməlidir.
Satınalma metodları layihədə belə sıralanır: açıq tender, ikimərhələli tender, qapalı tender, kotirovka sorğusu və bir mənbədən satınalma.
Qanunun dərc edildiyi gündən 6 ay sonra qüvvəyə minməsi nəzərdə tutulur.
