Əli Kərimli yenidən AXCP sədri seçildi
AXCP-nin 24 iyun qurultayı başa çatıb. Novator.az-ın məlumatına görə, Maştağa Mədəniyyət Mərkəzinin ev sahibliyi etdiyi qurultayda partiya sədri postuna seçki keçirilib. Yeganə namizəd olan Əli Kərimli gizli səsvermədə 227 nəfərin dəstəyini alaraq sədr kürsüsünü qoruyub.
7 nəfərdən ibarət Mərkəzi Nəzarət-Təftiş Komissiyasının seçildiyi, Ali Məclis üzvlərinin təsdiqləndiyi də bildirilir.
Azərbaycan Xalq Cəbhəsi (AXC) 1989-cu ildə yaradılıb, 1995-ci ildə partiyaya çevrilib.
Əli Kərimli 1965-ci il aprelin 28-də Saatlı rayonunun Azadkənd kəndində doğulub. Bakı Dövlət Universitetinin hüquq fakültəsini bitirib.
Milli azadlıq hərəkatının öncül şəxslərindəndir.
1991-ci ildən “Azadlıq” qəzetinin parlament müxbiri və şərhçisi olub. Əbülfəz Elçibəyin prezidentliyi zamanı (1992-1993-cü illər) əvvəl Prezident Aparatının şöbə müdiri, sonra dövlət katibi vəzifələrində çalışıb.
AXC (AXCP) sədrinin müavini, birinci müavini olub. 1995 və 2000-ci illərdə Milli Məclisin deputatı seçilib. AXCP-yə 2000-ci ildən rəhbərlik edir, sədr postuna ilk dəfə 2001-ci ildə seçilib. 2013-cü ildə yaradılmış Demokratik Qüvvələrin Milli Şurasının Koordinasiya Mərkəzinin üzvüdür.
