AXCP qurultayının gündəliyi
AXCP-nin 7-ci (10-cu) qurultayına 63 rayon təşkilatından 300-ə yaxın nümayəndə seçilib. Partiyadan Novator.az-a verilən məlumata görə, iyunun 24-ü Maştağa Mədəniyyət Mərkəzində keçiriləcək qurultay sədrin və Mərkəzi Nəzarət-Təftiş Komissiyasının hesabatlarını dinləyəcək. Gündəlikdə sədrin, Mərkəzi Nəzarət-Təftiş Komissiyası üzvlərinin seçkisi, rayon şöbələrindən Ali Məclisə seçilmiş şəxslərin təsdiqlənməsi də var.
Azərbaycan Xalq Cəbhəsi (AXC) 1989-cu ildə yaradılıb, təsis konfransında Əbülfəz Elçibəy sədr seçilib.
Əbülfəz Elçibəy 1992-1993-cü illərdə Azərbaycan prezidenti postunu tutub.
1991 və 1992-ci illərdə iki qurultay keçirən AXC 1995-ci ildəki 3-cü qurultayda partiyaya çevrilib. Həmin qurultay AXCP-nin ilk qurultayı sayılıb.
1-ci (4-cü) və 2-ci (5-ci) qurultaylarda partiya sədri seçilən Əbülfəz Elçibəy 2000-ci ildə vəfat edib.
2000-ci ildən AXCP-yə liderlik edən Əli Kərimli 2001-ci ildən başlayaraq dörd qurultayda partiya sədri seçilib.
1965-ci il təvəllüdlü Əli Kərimli milli azadlıq hərəkatının öncül şəxslərindəndir. Əbülfəz Elçibəyin prezidentliyi zamanı əvvəl Prezident Aparatının şöbə müdiri, sonra dövlət katibi vəzifələrində çalışıb, 1995 və 2000-ci illərdə Milli Məclisin deputatı seçilib.
1993-cü ildən AXC sədrinin müavini, daha sonra birinci müavini olub.
