Suriyada döyüşmüş 13 nəfər tutulub
Dövlət Təhlükəsizliyi Xidmətinin 22 iyun məlumatına görə, qeyri-leqal yollarla Suriyaya keçdikdən sonra İdlib şəhərində hərbi təlimlərə cəlb olunaraq odlu silahlardan istifadə qaydalarına yiyələnmiş, “Taifatul Mansura” adlı qanunsuz silahlı dəstənin tərkibində döyüşlərdə iştirak etmiş qrupun üzvləri beynəlxalq axtarışla tutulub Azərbaycana gətiriliblər. Tutulan 13 Azərbaycan vətəndaşının (Abdullayev Şəmil Töhüd oğlu, Ağamətov Murad Əlibala oğlu, Quliyev Murad Firudin oğlu, Rüstəmov Fərhad İsə oğlu, Sultanov Sultan İdris oğlu, Hüseynov Nəcməddin Nəzir oğlu, Mahmudov Hikmət Sahib oğlu, Əliyev Mais Telman oğlu, İsmayılov İsmayıl Aydın oğlu, Babayev Şəhriyar Rahim oğlu, Muradov Hacı Arif oğlu, Baxışov Əlövsər Əlisafa oğlu, Əsədov İntiqam Şirin oğlu) Cinayət Məcəlləsinin 283-1.3-cü (Azərbaycan Respublikasının hüdudlarından kənarda silahlı münaqişələrdə iştirak etmək məqsədilə sabit qruplar yaratma, həmin qruplarda, təlimlərdə və ya silahlı münaqişələrdə iştirak etmə) maddəsi ilə məsuliyyətə cəlb olunduğu, barələrində həbs qətimkan tədbiri seçildiyi bildirilir.
Suriyada 2011-ci ildə hakim rejimə qarşı başlayan xalq hərəkatı sonradan vətəndaş müharibəsinə çevrilib.
1971-2000-ci illərdə Suriyaya Hafiz Əsəd prezidentlik edib. 2000-ci ildən prezident postunu onun oğlu Bəşər Əsəd tutur.
