Rusiya saytları Bolqarıstanı işğal edib
Bolqarıstanda 370 sayt Rusiya təbliğatı aparmaq, Kremlin dezinformasiyalarını yaymaqla məşğuldur. Bunu ölkənin Humanitar və Sosial Tədqiqatlar Fondu aşkara çıxarıb. Novator.az-ın məlumatına görə, fond bəyan edib ki, Moskvanın təşviqat kampaniyalarının Bolqarıstanda sürətlə əks-səda verməsinin kökündə ilk növbədə həmin saytlar durur.
Rəsmi açıqlamaya əsasən, Rusiyadan qaynaqlanan dezinformasiya xarakterli hər hansı material Bolqarıstanda birdən-birə 370 saytda yerləşdirilir: “Bu isə ölkənin internet məkanında bir dezinformasiyanın əhatə dairəsinin dörd yüz dəfəyədək artması deməkdir. Proses həmçinin həqiqi kütləvi informasiya vasitələrinin internet məkanında sıxışdırılması ilə nəticələnir. 2022-ci ildə ölkə KİV-lərinin heç bir materialı ən populyar onlayn materiallar sırasında ilk onluğa düşə bilməyib”.
Kremlə dəstək verən saytların sayının ildən-ilə çoxaldığını vurğulayan fond 2022-ci ildə ölkənin internet məkanında Rusiyanın xeyrinə təbliğatın 2021-ci illə müqayisədə 20 faiz artdığını bildirir: “Dezinformasiya fəallığı sosial şəbəkələrin Bolqarıstan seqmentində də çox güclənib. Əsas fəallıq “Facebook” şəbəkəsində müşahidə olunur. 2022-ci ildə “Facebook”da bolqar ictimaiyyətini yanıltmağa hədəflənmiş, Rusiyanın mənafeyinə xidmət edən 45 mindən çox dezinformasiya dövriyyəyə buraxılıb. Həmin saxta xəbərlərə şəbəkənin 7 milyon yarımdan çox üzvü reaksiya verib”.
Əhalisinin çoxunun ruslarla etnik və dini bağlılığı olan Bolqarıstan Qərbə sıx inteqrasiya edib, Avropa İttifaqının və NATO-nun üzvüdür.
Mənbə: Euractiv.com
