Neft Fondunun büdcəsi yeniləndi
İyunun 22-də fərman imzalayan prezident İlham Əliyev Dövlət Neft Fondunun 2023-cü il büdcəsini yeniləyib. Dəyişikliyə görə, fondun gəlirləri 16,3 milyard manata, xərcləri 11,8 milyard manata yüksəlir.
Xərc istiqamətləri belə rəsmiləşir: 2023-cü ilin dövlət büdcəsinə köçürmə – 11 milyard 737,7 milyon manat; ali təhsil sisteminin beynəlxalq rəqabətliliyinin artırılması proqramı – 38,5 milyon manat; gənclərin xarici ölkələrin nüfuzlu ali təhsil müəssisələrində təhsil almaları proqramı – 36,7 milyon manat; fondun idarə edilməsi xərcləri – 37,1 milyon manat.
Dövlət Neft Fondu 1999-cu ildə yaradılıb. 2023-cü il aprelin 1-nə qurumun aktivləri 53,4 milyard dollar göstərilib.
