Ali Məhkəmənin qərarlarından şikayət məhdudlaşdırılır
Milli Məclisə “Konstitusiya Məhkəməsi haqqında” qanunda dəyişikliklər layihəsi daxil olub. Novator.az bildirir ki, əsas təkliflərdən biri Ali Məhkəmənin qərarları üzrə işlərə baxılmasını məhdudlaşdırır.
Azərbaycan Konstitusiyasına görə, Konstitusiya Məhkəməsinin Ali Məhkəmənin qərarlarının konstitusiyaya və qanunlara uyğunluğunu yoxlamaq səlahiyyəti də var. “Konstitusiya Məhkəməsi haqqında” qanuna təklif olunan yeniliyə əsasən, insan hüquqları üzrə müvəkkilin (ombudsmanın) bu məsələyə dair sorğusuna sorğu verilən qərarın konstitusiyaya və ya qanunlara uyğun olmayan normativ hüquqi akta əsaslandığı hallarda yol verilir. Paralel təklifə görə, Konstitusiya Məhkəməsi belə şikayətə şikayət edilən qərarın konstitusiyaya və ya qanunlara uyğun olmayan normativ hüquqi akta əsaslandığı hallarda baxa bilər.
Konstitusiya Məhkəməsi 9 hakimdən ibarətdir. Onları prezidentin təqdimatı ilə Milli Məclis təyin edir. Qurumun əsas missiyası qanunların, prezidentin fərman və sərəncamlarının, Milli Məclisin qərarlarının, Nazirlər Kabinetinin qərar və sərəncamlarının, mərkəzi icra hakimiyyəti orqanlarının normativ hüquqi aktlarının konstitusiyaya uyğunluğunu yoxlamaqdır.
Ali Məhkəmənin hakimlərini prezidentin təqdimatı ilə parlament təyin edir. Sədr prezident sərəncamı ilə 5 il müddətinə təyin olunur.
Ali Məhkəmə ümumi və ixtisaslaşdırılmış məhkəmələrin icraatına aid olan mülki (o cümlədən kommersiya və inzibati mübahisələrə dair), cinayət işləri və digər işlər üzrə ali məhkəmə orqanı, kassasiya instansiyasıdır.
