UEFA turnirlərində yeni püşklər
Azərbaycanı UEFA Çempionlar Liqasının 2023-2024 mövsümündə təmsil edən “Qarabağ” birinci mərhələdə (11-19 iyul) Cəbəllütariqin “Linkoln” komandasına rəqib olub. Novator.az bildirir ki, iyunun 21-də atılan püşkə görə, ikinci mərhələyə (25 iyul-2 avqust) yüksələcəyi halda Azərbaycan təmsilçisi “Rakov” (Polşa) – “Flora” (Estoniya) cütlüyünün qalibi ilə üz-üzə gələcək.
Üçüncü mərhələdə (8-15 avqust) “Qarabağ”ın bəxtinə “Sparta” (Çexiya), AEK (Yunanıstan), dördüncü mərhələdə (22-30 avqust) “Yanq Boyz” (İsveçrə) düşə bilər.
Turnirin ilkin və birinci mərhələlərində ələnənlər Konfrans Liqasına, sonrakı üç mərhələsində ələnənlər və qruplarda üçüncü yeri tutanlar Avropa Liqasına köçür.
Konfrans Liqasındakı Azərbaycan təmsilçiləri turnirə ikinci mərhələdən (27 iyul-3 avqust) qoşulur. 21 iyun püşkü “Qəbələ”yə Kiprdən “Omoniya”nı, “Sabah”a “Makedoniya” (Şimali Makedoniya) – RFS (Latviya) cütlüyünün, “Neftçi”yə “Jelezniçar” (Bosniya) – “Dinamo” (Minsk, Belarus) cütlüyünün qalibini qismət edib.
Sonrakı mərhələlərdə hər üç təmsilçinin mümkün rəqibləri arasında “Alkmaar” (Niderland), “Dinamo” (Ukrayna), “Partizan” (Serbiya), “Rapid” (Avstriya), “Aroka” (Portuqaliya), “Yuventus” (İtaliya), “Ayntraxt” (Frankfurt, Almaniya), “Lill” (Fransa) var.
