Cəbhəçilərin qurultayı təyin olundu
Azərbaycan Xalq Cəbhəsi Partiyasının (AXCP) 7-ci (10-cu) qurultayı təyin olunub. Rəsmi məlumata görə, qurultaya iyunun 24-də Maştağa Mədəniyyət Mərkəzi ev sahibliyi edəcək.
1989-cu ildə yaradılan Azərbaycan Xalq Cəbhəsi 1995-ci ildə partiyaya çevrilib. Quruma Əli Kərimli liderlik edir. Partiyanın 6-cı (9-cu) qurultayı 2015-ci il sentyabrın 27-də keçirilib.
Novator.az bildirir ki, 1965-ci il təvəllüdlü Əli Kərimli Bakı Dövlət Universitetinin hüquq fakültəsini bitirib.
Milli azadlıq hərəkatının öncül şəxslərindəndir.
1991-ci ildən “Azadlıq” qəzetinin parlament müxbiri və şərhçisi olub. Əbülfəz Elçibəyin prezidentliyi zamanı (1992-1993-cü illər) əvvəl Prezident Aparatının şöbə müdiri, sonra dövlət katibi vəzifələrində çalışıb.
1993-cü ildən AXC sədrinin müavini, daha sonra birinci müavini olub. 1995 və 2000-ci illərdə Milli Məclisin deputatı seçilib. AXCP-yə 2000-ci ildən rəhbərlik edir, sədr postuna 2001-ci ildə seçilib. 2013-cü ildə yaradılmış Demokratik Qüvvələrin Milli Şurasının Koordinasiya Mərkəzinin üzvüdür.
