Xarici ticarətin beş ayı
Xarici ticarət hesabatı yayılıb. Novator.az bildirir ki, Dövlət Gömrük Komitəsinin təqdim etdiyi statistikaya görə, Azərbaycan 2023-cü ilin yanvar-may aylarında 185 ölkə ilə ticarət aparıb, ixrac 16,1 milyard dolları, idxal 6,8 milyard dolları keçib, gömrükdən dövlət büdcəsinə 2,5 milyard manatdan çox vəsait ödənib.
Yanvarda 1,8 milyard, fevralda 2,6 milyard, martda 3,2 milyard, apreldə 4,8 milyard, mayda 3,5 milyard dollarlıq ixrac qeydə alınıb.
İdxal göstəriciləri belədir: yanvar – 1,4 milyard dollar, fevral və aprel – 1,2 milyard dollar, mart – 1,3 milyard dollar, may – 1,5 milyard dollar.
İxracın 90,9 faizinin neft-qaz sektoruna aid olduğu, idxalda ən böyük payın (17,7 faiz) maşın, mexanizm, elektrik aparatları, avadanlıqlar və onların hissələrini əhatə etdiyi vurğulanır.
Məlumata əsasən, ixracın 4 faizə yaxını MDB ölkələrinə, 66,9 faizə yaxını Avropa İttifaqı ölkələrinə, 29,1 faizindən çoxu başqa ölkələrə yönəlib, idxalda MDB-nin payı 30,7 faizi, Avropa İttifaqının payı 19,3 faizi, başqa ölkələrin payı 49,9 faizi ötüb.
Ticarət dövriyyəsində və ixracda əsas tərəfdaş kimi İtaliya, idxalda əsas tərəfdaş kimi Rusiya göstərilir.
