Müdafiə nazirindən göstərişlər
İyunun 16-da Müdafiə Nazirliyi Kollegiyasının iclası keçirilib. Rəsmi məlumata görə, iclasda Azərbaycan-Ermənistan sərhədi və Qarabağ bölgəsində əməliyyat şəraiti də təhlil edilib. Nazir Zakir Həsənov Ermənistan silahlı qüvvələri və qeyri-qanuni erməni silahlı dəstələrinin Azərbaycan mövqelərini intensiv atəşə tutmasının, Qarabağda qeyri-qanuni hərbi daşımaların və uzunmüddətli mühafizə qurğularının quraşdırılması cəhdlərinin cavabsız qalmadığını deyib, təxribatın qarşısının qətiyyətlə alınmasına hər an hazır olmaq göstərişləri verib.
Ermənistan 1988-1994-cü illərin təcavüzündə Azərbaycanın altıda birini işğal edib, Yuxarı Qarabağ bölgəsində separatçı rejim qurulub.
2020-ci il sentyabrın 27-dən noyabrın 10-dək Azərbaycanın apardığı hərbi əməliyyatlarda və savaşdan sonrakı danışıqlarla Cəbrayıl, Füzuli, Zəngilan, Qubadlı, Ağdam, Kəlbəcər, Laçın rayonları tam, Şuşa, Xocavənd, Xocalı rayonları və keçmiş Ağdərə rayonu qismən azad olunub.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi işğalçı rejimin əlindədir. Həmin ərazilərə və bölgədən Ermənistana gedən Laçın yoluna Rusiyanın hərbi kontingenti nəzarət edir.
Sədərək rayonunun 1, Qazax rayonunun 7 kəndi də işğalda qalır.
