ABŞ-da ilk dəfə müsəlman qadın federal hakim oldu
ABŞ tarixində ilk dəfə olaraq müsəlman qadın federal hakim postuna təsdiqlənib.
Novator.az xəbər verir ki, söhbət əslən Banqladeşdən olan amerikalı hüquqşünas Nüsrət Cahan Çoudhuridən gedir.
ABŞ-da federal hakim postuna namizədləri prezident irəli sürür. Namizədin təsdiqlənməsi məsələsinə Konqresin yuxarı palatasında – Senatda baxılır.
Nüsrət Çoudhurinin namizədliyini prezident Cozef Bayden yanvarın 3-də irəli sürmüşdü. İyunun 15-də o, Senatın dəstəyini ala bilib.
46 yaşlı Nüsrət Çoudhuri Nyu-York Şərq Dairəsində hakimlik edəcək.
Buna qədər o, Amerika Vətəndaş Azadlıqları Birliyinin (ACLU) İllinoys bölməsinin hüquq üzrə direktoru vəzifəsində çalışıb.
Nüsrət Çoudhuri Zahid Qureyşidən sonra ABŞ-da federal hakim postunu tutan ikinci müsəlmandır. Zahid Qureyşi 2021-ci ildən Nyu-Cersi Dairəsi üzrə federal hakimdir.
Mənbə: NBCNews.com
