Almaniyaya kiberhücum artıb – “Bloomberg”
Rusiya Ukraynada total müharibəyə başlayandan Almaniyanın biznes qurumlarına kiberhücumlar artıb. Xəbəri ABŞ-ın “Bloomberg” agentliyi yayıb.
Novator.az bildirir ki, agentlik Almaniya Federal İnformasiya Təhlükəsizliyi İdarəsinin və beynəlxalq miqyasda müstəqil ekspert qrupu kimi tanınan, əsasən alman mütəxəssislərdən ibarət olan Texniki İnspeksiya Nəzarəti Assosiasiyasının birgə araşdırmasına istinad edib.
Araşdırma 2022-ci ildə Almaniya müəssisələrinin 11%-nin kiberhücuma məruz qaldığını üzə çıxarıb. Bu isə ümumilikdə 50 minə yaxın hücum deməkdir.
Hücuma məruz qalan müəssisələrin yarıdan çoxu təhlükənin Rusiya-Ukrayna müharibəsi başlanandan sonra artdığını vurğulayıb.
Hücumların əsas hədəfi Almaniyanın iri biznes qurumları, səhiyyə müəssisələri, həmçinin dövlət təşkilatları olub.
Almaniya Federal İnformasiya Təhlükəsizliyi İdarəsinin rəhbəri Yohannes Bussman deyib ki, Rusiya-Ukrayna müharibəsi ilə yanaşı süni intellektin inkişafı da kibertəhlükəsizlik sahəsində riskləri artırıb.
2014-cü ildə Ukraynanın Krım yarımadasını tam, Donbas bölgəsini qismən işğal edən Rusiya 2022-ci il fevralın 24-dən bu ölkəyə qarşı total müharibə aparır.
Mənbə: Bloomberg.com
