Makroiqtisadi göstəricilər
2023-cü ilin yanvar-may aylarında Azərbaycanda kənd təsərrüfatının ümumi məhsulu ötən ilin eyni dövrü ilə müqayisədə 5,2 faiz (heyvandarlıq məhsulları istehsalı 3,5 faiz, bitkiçilik məhsulları istehsalı 10,9 faiz) artıb. Hesabatı yayan Dövlət Statistika Komitəsi həmçinin bildirir ki, nəqliyyat sektorunda yük daşınması üzrə 6,8 faiz, sərnişin daşınması üzrə 19 faiz yüksəliş qeydə alınıb, informasiya və rabitə xidmətlərinin həcmində 13,5 faiz artım rəsmiləşib.
Əhalinin gəlirlərinin nominal ifadədə 14,7 faiz artdığı, yanvar-may aylarında dövlət büdcəsinə 13 milyard 961 milyon manatın daxil olduğu, büdcədən 11 milyard 142,4 milyon manatın xərcləndiyi vurğulanır.
Statistikaya əsasən, ictimai iaşə dövriyyəsi üzrə real ifadədə 25,9 faiz, ödənişli xidmətlərin dəyərində real ifadədə 13,8 faiz artım qeydə alınıb.
Mayın 1-nə bank və digər kredit təşkilatlarının kredit portfeli milli valyuta ekvivalentində 21 milyard 5,9 milyon manat, əhalinin banklardakı əmanətlərinin milli valyuta ekvivalentində məbləği 12 milyard 211,6 milyon göstərilib.
