Səfər başladı
İyunun 12-də Türkiyə prezidenti Rəcəb Teyyub Ərdoğanın Azərbaycana dövlət səfəri başlayıb. AZƏRTAC xəbər verir ki, paytaxt Bakının beynəlxalq aeroportunda ali qonağı və xanımı Əminə Ərdoğanı baş nazirin birinci müavini Yaqub Eyyubov, xarici işlər nazirinin müavini Xələf Xələfov və başqa rəsmi şəxslər qarşılayıb.
Həmin gün “Gülüstan” sarayında Azərbaycan prezidenti İlham Əliyevin və xanımı Mehriban Əliyevanın adından Rəcəb Teyyub Ərdoğanın və xanımı Əminə Ərdoğanın şərəfinə dövlət ziyafəti verilib. Ziyafət konsert proqramı ilə davam edib.
Bu, Rəcəb Teyyub Ərdoğanın üçüncü prezidentlik dönəmində Azərbaycana ilk gəlişidir.
1954-cü il təvəllüdlü Rəcəb Teyyub Ərdoğan siyasətə 1976-cı ildə qoşulub. Milli Salamat, Rifah, Fəzilət partiyalarının üzvü olub. 1994-1998-ci illərdə İstanbul bələdiyyəsinin başçısı postunu tutub. 1999-cu ildə həbsdə yatıb.
2001-ci ildə Ədalət və İnkişaf Partiyasını yaradıb. 2003-cü il martın 14-dən baş nazirlik edib, 2014-cü il avqustun 10-da, 2018-ci il iyunun 24-də prezident seçilib.
2018-ci ilin seçkisindən sonra prezident həm də hökumət başçısıdır.
2023-cü il mayın 14-ü, parlament seçkisi ilə eyni gündə keçirilən prezident seçkisi mayın 28-nə – ikinci tura qalıb, Rəcəb Teyyub Ərdoğan üstün gəlib, iyunun 3-də and içərək səlahiyyətlərinin icrasına başlayıb.
