Abid Qafarov mühacirətə gedə bilər
Keçmiş məhbus Abid Qafarov işsiz qalıb. İyunun 7-də “Turan”a danışan Abid Qafarov deyib ki, həbsdən çıxandan sonra BP şirkətinin Azərbaycan ofisindəki işindən çıxarıldığını və bu qərarın dəyişməz qalacağını bilib. 6 nəfərdən ibarət ailəsinin dolanışıq problemi çəkdiyini qeyd edən Abid Qafarov iş tapmaq üçün mühacirətə getmək barədə düşündüyünü vurğulayıb.
1981-ci il təvəllüdlü Abid Qafarov Azərbaycan Dövlət Neft və Sənaye Universitetini bitirib. Neft-qaz, enerji sektorunda çalışıb, həmçinin ictimai fəaliyyəti, jurnalist araşdırmaları ilə tanınıb. KİM TV internet kanalının qurucusudur.
Yasamal Rayon Məhkəməsi 2022-ci il iyulun 13-də Abid Qafarovu bir qrup qaziyə böhtan atmaq və onları təhqir etməkdə təqsirli bilərək 1 il müddətinə azadlıqdan məhrum edib, o, məhkəmə zalında tutulub.
İkinci Qarabağ müharibəsi qazilərinin xüsusi ittiham qaydasında şikayətlərində Abid Qafarovun KİM TV-də müharibə veteranlarını öz hüquqları uğrunda mübarizə aparmamaqda, çarəsizlikdən ağızlarını tikməkdə, özlərini yandırmaqda, itaətkarcasına davranmaqda qınadığı əsas gətirilib.
Avqustun 30-da Bakı Apellyasiya Məhkəməsi cəzanı qüvvədə saxlayıb, jurnalist bəraət istəyi ilə Ali Məhkəməyə üz tutub.
2023-cü il fevralın 16-da Ali Məhkəmə işi apellyasiya baxışına qaytarıb, iyunun 1-də Bakı Apellyasiya Məhkəməsi cəzanı yüngülləşdirərək Abid Qafarovu azadlığa buraxıb.
