Gültəkin Hacıbəyli dövlətdən 5000 avro uddu
İyunun 8-də Avropa İnsan Hüquqları Məhkəməsinin Azərbaycan üzrə yeni qərarları elan edilib. Aihmaz.org-un məlumatına görə, qərarlardan biri siyasətçi Gültəkin Hacıbəylinin şikayəti əsasında çıxarılıb.
Gültəkin Hacıbəyli keçmiş həyat yoldaşı ilə məhkəmə çəkişmələrinin nəticəsindən narazı qalaraq Avropaya üz tutmuşdu. Avropa Məhkəməsi Gültəkin Hacıbəylinin Avropa İnsan Hüquqları Konvensiyası ilə qorunan şəxsi və ailə həyatına hörmət hüququnun pozulduğu qənaətinə gəlib. Qərara görə, Azərbaycan dövləti siyasətçiyə 5000 avro təzminat ödəməlidir.
Gültəkin Hacıbəyli 2000 və 2005-ci illərdə Milli Məclisin deputatı seçilib. Demokratik Qüvvələrin Milli Şurasının Koordinasiya Mərkəzinin üzvüdür.
Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarətə məsuldur. Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin təsir dairəsindədir.
