Neft hasilatında gələcək norma
Neft ixrac edən ölkələrin OPEK+ koalisiyası (OPEK ölkələrindən Anqola, Birləşmiş Ərəb Əmirlikləri, Ekvatorial Qvineya, Əlcəzair, İraq, Konqo, Küveyt, Qabon, Nigeriya, Səudiyyə Ərəbistanı və qeyri-OPEK ölkələri (Azərbaycan, Bəhreyn, Bruney, Cənubi Sudan, Qazaxıstan, Malayziya, Meksika, Oman, Rusiya, Sudan) iyunun 4-də razılaşma əldə edib. Novator.az bildirir ki, yeniliyə görə, 2024-cü ildə Azərbaycanın gündəlik xam neft hasilatı 551 min barreli aşa bilməz.
2022-ci ilin noyabrından gündəlik hasilat həddi 684 min barreldir.
Azərbaycanın 2023-cü il büdcəsində bir barrel neft 50 dollardan götürülüb, “AzəriLayt” markalı neft yanvara 87,99, fevrala 87,53, marta 85,01, aprelə 81,88, maya 79,04, iyuna 75,05 dollarla başlayıb.
Yanvar-aprel aylarında 10,2 milyon ton neft çıxarılıb, 5,7 milyard dollarlıq xam neft və xam neft məhsulu ixrac olunub.
Gündəlik xam neft hasilatı yanvarda 533 min barrel, fevralda 531 min barrel, martda 515 min barrel, apreldə 512 barrel göstərilib.
