Lirənin seçki sınağı
Türkiyə lirəsi qoşa seçki fonunda 0,0052 manat dəyər itirib.
Mayın 14-ü Türkiyədə parlament və prezident seçkiləri keçirilib, prezident seçkisi mayın 28-i ikinci turla davam edib.
Novator.az bildirir ki, Azərbaycan Mərkəzi Bankı qoşa seçkinin səhəri günü Türkiyə lirəsini 0,0866 manata satıb. Mayın 16-da rəsmi kurs 0,0864, mayın 17-də 0,0861, mayın 18-də 0,0860, mayın 19-da 0,0858 manata düşüb.
23-26 may arası məzənnə 0,0857 manatdan 0,0850 manata geriləyib.
Mayın 30-da lirə banklara 0,0841, mayın 31-də 0,0825 manata təklif olunub.
İyun 0,0819 manatla başlayıb, ayın 2-də kurs 0,0814 manata enib.
Türkiyə Mərkəzi Bankı iyunun 2-də ABŞ dollarına 20,7 lirədən yuxarı qiymət qoyub.
Lirə 2021-ci ilin sonlarından kəskin ucuzlaşır. Azərbaycan Mərkəzi Bankının məzənnə hesabatlarına görə, 100 Türkiyə lirəsi 2021-ci ilə 22 manat 91 qəpiklə başlayıb, ili 13 manat 29 qəpiklə yola salıb.
2022-ci il 9 manat 9 qəpiklə bitib.
2023-cü ilin siftə qiyməti 9 manat 7 qəpik olub, iyunun 2-dək 93 qəpik ucuzlaşma qeydə alınıb.
2002-ci ildən Türkiyədə Ədalət və İnkişaf Partiyası hakim partiyadır. Bu partiyanın lideri Rəcəb Teyyub Ərdoğan 2003-cü ildən baş nazirlik edib, 2014-cü il, 2018-ci il və 2023-cü ildə prezident seçilib.
