Ərdoğanın qələbəsi rəsmiləşdi
Türkiyənin Ali Seçki Qurumu prezident seçkisinin nəticələrini təsdiqləyib. Novator.az bildirir ki, rəsmi hesabata görə, mayın 28-də keçirilmiş ikinci turda dövlət başçısı, Ədalət və İnkişaf Partiyasının lideri Rəcəb Teyyub Ərdoğan 52,18 faiz səslə qalib gəlib, Millət ittifaqının namizədi, parlament üzvü, Cümhuriyyət Xalq Partiyasının lideri Kamal Kılıçdaroğlu 47,82 faiz səs toplayıb.
İlk tur mayın 14-ü parlament seçkisi ilə birgə keçirilmiş, Rəcəb Teyyub Ərdoğan 49,52 faiz, Kamal Kılıçdaroğlu 44,88 faiz, Ata ittifaqının namizədi, müstəqil siyasətçi Sinan Oğan 5,17 faiz, liderlik etdiyi Məmləkət Partiyasının namizədi, mayın 11-də yarışdan çəkilmiş Məhərrəm İncə 0,43 faiz səs götürmüşdü.
Parlament seçkisinin rəsmi nəticələrinə görə, Ədalət və İnkişaf Partiyası və müttəfiqləri 600 nəfərlik Türkiyə Böyük Millət Məclisində 323 mandata sahib çıxıb.
1954-cü il təvəllüdlü Rəcəb Teyyub Ərdoğan 2003-cü il martın 14-dən baş nazirlik edib, 2014-cü il avqustun 10-da, 2018-ci il iyunun 24-də prezident seçilib.
2018-ci ilin seçkisindən sonra prezident həm də hökumət başçısı sayılır.
