Türkiyə: parlament seçkisinin nəticələri təsdiqləndi
Türkiyənin Ali Seçki Qurumu mayın 14-də keçirilmiş parlament seçkisinin rəsmi nəticələrini açıqlayıb. Novator.az bildirir ki, Xalq ittifaqından Ədalət və İnkişaf Partiyası 600 nəfərlik Türkiyə Böyük Millət Məclisində 268 mandata (Demokratik Sol və Hür Dava partiyaları ilə birgə) sahib çıxır, Milliyyətçi Hərəkat Partiyası 50, Yenidən Rifah Partiyası 5 yer götürür.
Millət ittifaqında Cümhuriyyət Xalq Partiyası 169 mandat (Demokratiya və Sıçrayış, Gələcək, Səadət, Demokrat, Türkiyə İslahat partiyaları, Yaxşı Partiya ilə birgə), Yaxşı Partiya 43 mandat alır.
Əmək və Azadlıq ittifaqından Yaşıllar və Sol Gələcək Partiyası 61 mandat (Xalqların Demokratik və Əmək partiyaları ilə birgə), Türkiyə Fəhlə Partiyası 4 mandat əldə edir.
Parlament seçkisi prezident seçkisi ilə eyni gündə keçirilib. İlk turu Xalq ittifaqının namizədi, dövlət başçısı, Ədalət və İnkişaf Partiyasının lideri Rəcəb Teyyub Ərdoğan 49,52 faiz, Millət ittifaqının namizədi, parlament üzvü, Cümhuriyyət Xalq Partiyasının lideri Kamal Kılıçdaroğlu 44,88 faiz, Ata ittifaqının namizədi, müstəqil siyasətçi Sinan Oğan 5,17 faiz, liderlik etdiyi Məmləkət Partiyasının namizədi, mayın 11-də yarışdan çəkilmiş Məhərrəm İncə 0,43 faiz səslə bitirib.
Mayın 28-də keçirilmiş ikinci turda Rəcəb Teyyub Ərdoğan 52,18 faiz, Kamal Kılıçdaroğlu 47,82 faiz səs toplayıb.
1954-cü il təvəllüdlü Rəcəb Teyyub Ərdoğan 2003-cü ildən baş nazirlik edib, 2014-cü ildə prezident seçilib. 2017-ci ildə Türkiyədə prezident idarə üsuluna keçidi nəzərdə tutan konstitusiya referendumu olub, 2018-ci ildə Rəcəb Teyyub Ərdoğan yenidən prezident postuna mandat alaraq həm də hökumət başçısı səlahiyyətlərinə yiyələnib.
