Qarabağ xəbərdarlığına dəstək
Mayın 28-i Laçın şəhərində əhali ilə görüşən prezident İlham Əliyev Qarabağ bölgəsinin bir hissəsinə nəzarət edən işğalçı rejimə səslənib: “Yeganə yol qalıb – Azərbaycan qanunlarına tabe olmaq, Azərbaycanın loyal normal vətəndaşı olmaq, öz dırnaqarası saxta dövlət atributlarını zibil yeşiyinə atmaq, “parlament”i buraxmaq.
Guya orada “parlament” fəaliyyət göstərir, guya orada prezident var, guya nazir var, bunlar hamısı gülməlidir. “Parlament” buraxılmalıdır, özünü “prezident” adlandıran ünsür təslim olmalıdır, bütün “nazirlər”, “deputatlar” və digərləri öz vəzifələrini artıq kənara qoymalıdırlar. Ancaq o təqdirdə onlara güzəşt oluna bilər”.
Azərbaycan Demokratiya və Rifah Partiyasının sədri Qubad İbadoğlu qeyd edir ki, suveren və unitar dövlətin ərazisində iki respublika, iki prezident, iki parlament, nazirlər, prokurorlar, məhkəmələr, müxtəlif hərbi mərkəzlərdən idarə olunan iki ordu ola bilməz: “Qarabağdakı qanunsuz erməni silahlı qüvvələri tərksilah olunmalı; işğalçı rus qoşunları Azərbaycan ərazisindən çıxarılmalı; Qarabağda bütün icra strukturları, hüquq mühafizə orqanları, prokurorluq və məhkəmə hakimiyyəti Azərbaycan Konstitusiyasına müvafiq formalaşdırılmalı, Azərbaycanın yurisdiksiyasında fəaliyyət göstərməli; azərbaycanlılar Şuşa, Xocavənd, Xocalı rayonlarında, Xankəndi şəhərində məskunlaşmalı; Qarabağda yaşayanlar milli mənsubiyyətindən asılı olmayaraq Azərbaycan vətəndaşlığını qəbul etməli; yerli idarəetmə orqanları azad və ədalətli seçkilər əsasında formalaşmalı; Qarabağ rayonlarının büdcəsi Azərbaycanın büdcə sisteminin tərkib hissəsi olmalıdır”.
1988-ci ildə ermənilər Azərbaycanın Dağlıq (Yuxarı) Qarabağ bölgəsinin Ermənistana verilməsi tələbi ilə təcavüzə başlayıb. 1991-ci ildə ermənilər bölgəni “müstəqil dövlət” elan edib. Bunun ardınca müharibə alovlanıb. 1994-cü ildə elan olunan atəşkəsə qədər Ermənistan Yuxarı Qarabağı və onun ətrafındakı rayonları işğal edib.
2020-ci il sentyabrın 27-dən noyabrın 10-dək Azərbaycanın apardığı hərbi əməliyyatlarda və savaşdan sonrakı danışıqlarla Cəbrayıl, Füzuli, Zəngilan, Qubadlı, Ağdam, Kəlbəcər, Laçın rayonları tam, Şuşa, Xocavənd, Xocalı rayonları və keçmiş Ağdərə rayonu qismən azad olunub.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi işğalçı rejimin əlindədir. Həmin ərazilərə və bölgədən Ermənistana gedən Laçın yoluna Rusiyanın hərbi kontingenti nəzarət edir.
Özünü “Dağlıq Qarabağ Respublikası” və ya “Arsax Respublikası” adlandıran işğalçı rejimdə 1991-ci ildən 7 “parlament seçkisi”, 6 “prezident seçkisi”, 7 “bələdiyyə seçkiləri”, 3 “referendum” keçirilib.
Müxtəlif illərdə rejimə Leonard Petrosyan (iki dəfə), Artur Mkrtçyan, Georgi Petrosyan, Robert Köçəryan, Arkadi Qukasyan, Bako Saakyan rəhbərlik edib.
2020-ci ildən Araik Arutunyan rejim başçısıdır.
