Bakıda beynəlxalq riyaziyyat olimpiadaçıları konfransı keçirilib
“Global Olympiad Center”in təşkilatçılığı ilə ölkə tarixində ilk dəfə olaraq “Azərbaycandan dünyaya” adı altında beynəlxalq riyaziyyat olimpiadaçıları konfransı təşkil olunub.
Əsas məqsədi beynəlxalq riyaziyyat olimpiadalarında uğur qazanmaq istəyən şagirdləri, onların valideyn və müəllimlərini doğru şəkildə istiqamətləndirmək olan konfrans dövlət himninin oxunması ilə başlanıb. Şəhidlərin əziz xatirəsi bir dəqiqəlik sükutla yad edilib.
Tədbiri açıq elan edən “Global Olympiad Center”in direktoru Xəyal İbrahimzadə olimpidaçı şagirdlərin yetişməsinin vacibliyindən danışıb.
Elm və Təhsil Nazirliyinin ümumi təhsilin təşkili və idarəolunması sektorunun müdiri Fuad Qarayev riyaziyyat fənn olimpiadalarının perspektivindən söz açıb.
Ardınca Türkiyənin Akdeniz Universitetinin professorları İlham Əliyev və Mustafa Özdəmir, riyaziyyat olimpiadaları üzrə türkiyəli təlimatçı İhsan Yücel, digər türkiyəli mütəxəssis Yücel Arıcı, fizika-riyaziyyat üzrə fəlsəfə doktoru Rauf Tağıyev, ADA Universitetinin professoru Rafael Əlizadə, Təhsil İnstitutunun istedadlı uşaqlarla iş şöbəsinin əməkdaşı Qorxmaz Mustafayev çıxış ediblər.
Qonaqlar müəllimlərin, tələbələrin, şagirdlərin suallarını cavablandırıblar.
Sonda iştirakçılara sertifikatlar təqdim olunub.
