İştiraka etiraz
Prezident İlham Əliyev mayın 25-i Rusiya paytaxtı Moskvada Avrasiya Ali İqtisadi Şurasının iclasına qonaq qismində qatılaraq çıxış edib.
Avrasiya Ali İqtisadi Şurası Avrasiya İqtisadi İttifaqının əsas orqanıdır. İttifaqı 2014-cü ildə Rusiya, Qazaxıstan və Belarus yaradıb, həmin il Ermənistan və Qırğızıstan da quruma qoşulublar.
Özbəkistan, Moldova və Kuba ittifaqda müşahidəçilərdir.
25 may sammitində Rusiya, Belarus, Qazaxıstan, Qırğızıstan prezidentləri, Ermənistanın baş naziri iştirak ediblər.
Özbəkistan, Tacikistan prezidentləri iclasa video vasitəsilə qatılıblar, Kuba prezidentinin çıxışının videoyazısı səsləndirilib.
25 may iclası İlham Əliyevin Avrasiya İqtisadi İttifaqının tədbirində ilk iştirakı olub.
Novator.az-ın məlumatına görə, AXCP sədri Əli Kərimli Azərbaycan prezidentinin Avrasiya İqtisadi İttifaqının sammitində iştirakını ölkənin milli maraqlarına zidd addım saydığını yazır: “Avrasiya İttifaqı Rusiyanın təşəbbüsü ilə Avropa İttifaqına alternativ kimi yaradılıb. Rusiyanın bu imperiya qurumunda iştirak Avropa İttifaqı ilə inteqrasiyanı istisna edir. Avrasiya İttifaqı Kollektiv Təhlükəsizlik Müqaviləsi Təşkilatı (1992-ci ildə yaradılmış bu hərbi-siyasi quruma Rusiya, Belarus, Ermənistan, Qazaxıstan, Qırğızıstan və Tacikistan daxildir – red.) ilə birlikdə yeni imperiya layihəsinin bünövrəsi olaraq düşünülüb. Rusiyanın ən yaxın müttəfiqlərinin belə ondan məsafə saxlamağa başladığı bir vaxtda İlham Əliyevin Rusiyanın imperiya siyasətinə dəstək verməsi məntiqsizdir və yalnız avtoritar rejimlər arasında həmrəyliyi gücləndirmək, regionu gözləyən qlobal demokratik dəyişiklikləri ləngitmək istəyi ilə izah edilə bilər”.
