Neftsiz ixracın astar üzü
Dövlət Gömrük Komitəsinin hesabatına görə, Azərbaycan 2023-cü ilin yanvar-aprel aylarında 1 milyard 187,2 milyon dollarlıq qeyri-neft məhsulu ixrac edib. Elektrik enerjisi ixracı 313,6, meyvə-tərəvəz ixracı 161, plastmas və ondan hazırlanan məmulatlar ixracı 160,7, kimya sənayesi məhsulları ixracı 90,4, alüminium və ondan hazırlanan məmulatlar ixracı 73,4 milyon dollarla ilk beşlikdə göstərilib.
Novator.az bildirir ki, rəsmi statistikaya nəzər salan iqtisadçı Rövşən Ağayev yazır: “Qeyri-neft ixracının ötən ilin ilk dörd ayına nəzərən 23 faiz və ya 222 milyon dollar artdığı qeyd edilir. İxracın əmtəə strukturuna baxdıqda artımın əsasən elektrik enerjisi ixracı hesabına baş verdiyi görünür. Bu məhsul üzrə ixrac 9,5 dəfə artıb. Elektrik enerjisi ixracının ümumi qeyri-neft ixracında xüsusi çəkisi 3,4 faizdən 26 faizə yüksəlib. Təbii qaz hesabına alınan enerji məhsulunu qeyri neft-qaz məhsulu kateqoriyasına aid etmək bir ayrı mövzudur”.
Ekspert yazır ki, yanvar-aprel aylarında meyvə-tərəvəz ixracı ötən ilin eyni dövrü ilə müqayisədə 1,5 milyon dollar azalıb: “Metal ixracında 43 milyon dollar, kimya sənayesi məhsulları ixracında 39 milyon dollar, pambıq ixracında 69 milyon dollar azalma rəsmiləşib”.
İçki ixracında 17 milyon dollar, plastmas və ondan hazırlanan məmulatlar ixracında 20 milyon dollar həndəvərində artım olduğunu vurğulayan iqtisadçı əlavə edir ki, elektrik enerjisi nəzərə alınmadıqda qeyri-neft ixracı ötən ilin ilk dörd ayına nəzərən 58 milyon dollar və ya 6 faiz azalıb.
