Xarici ticarətin dörd ayı
Dövlət Gömrük Komitəsi xarici ticarət hesabatı yayıb. Novator.az bildirir ki, statistikaya görə, 2023-cü ilin yanvar-aprel aylarında Azərbaycan 179 ölkə ilə ticarət aparıb, ixrac 12,5 milyard dolları, idxal 5,2 milyard dolları keçib, gömrükdən dövlət büdcəsinə 2 milyard 46,6 milyon manatdan çox vəsait ödənib.
Yanvarda 1,8 milyard, fevralda 2,6 milyard, martda 3,2 milyard, apreldə 4,8 milyard dollarlıq ixrac qeydə alınıb.
İdxal göstəriciləri belədir: yanvar – 1,4 milyard dollar, fevral və aprel – 1,2 milyard dollar, mart – 1,3 milyard dollar.
İxracın 90,5 faizinin neft-qaz sektoruna aid olduğu, idxalda ən böyük payın (17,5 faiz) maşın, mexanizm, elektrik aparatları, avadanlıqlar və onların hissələrini əhatə etdiyi vurğulanır.
Məlumata əsasən, ixracın 3,8 faizindən çoxu MDB ölkələrinə, 67,2 faizindən çoxu Avropa İttifaqı ölkələrinə, 29 faizə yaxını başqa ölkələrə yönəlib, idxalda MDB-nin payı 31,2 faizi, Avropa İttifaqının payı 19,1 faizi, başqa ölkələrin payı 49,5 faizi ötüb.
Ticarət dövriyyəsində və ixracda əsas tərəfdaş kimi İtaliya, idxalda əsas tərəfdaş kimi Rusiya göstərilir.
