Şuşa qoruğunda yeni rəhbər
Şuşa Şəhəri Dövlət Qoruğu İdarəsinin Müşahidə Şurası Tural Novruzovu icraçı direktor təyin edib. Xəbəri mayın 17-də Report.az yayıb.
Əsası 1750-ci ildə qoyulan Şuşa şəhəri 1992-ci il mayın 8-9-dan erməni işğalında olub, 2020-ci il noyabrın 8-də azad edilib.
2009-cu il fevralın 27-dən Şuşa Rayon İcra Hakimiyyətinə Bayram Səfərov başçılıq edir.
2021-ci il yanvarın 27-də Aydın Kərimov prezidentin Şuşa rayonunda xüsusi nümayəndəsi təyin olunub, mayın 7-də Şuşa şəhəri Azərbaycanın mədəniyyət paytaxtı elan edilib, iyunun 22-də Şuşa Şəhəri Dövlət Qoruğu İdarəsi yaradılıb, iyulun 16-da Məftun Abbasov qurumun İdarə Heyətinin sədri postuna təyinat alıb.
2022-ci il oktyabrın 21-də imzalanan prezident fərmanı ilə Şuşa Şəhəri Dövlət Qoruğu İdarəsinin fəaliyyətinə ümumi rəhbərliyi və nəzarəti həyata keçirmək üçün Müşahidə Şurası yaradılıb. İdarənin fəaliyyətinə cari rəhbərliyi həyata keçirən icraçı direktorun təyinatı Müşahidə Şurasının səlahiyyətindədir. Aydın Kərimovun sədrlik etdiyi şurada Elnur Əliyev (iqtisadiyyat nazirinin birinci müavini), Namiq Hümmətov (Dövlət Şəhərsalma və Arxitektura Komitəsi sədrinin birinci müavini), Azadə Hüseynova (Dövlət Turizm Agentliyi sədrinin müavini) və Azad Cəfərli (Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi) təmsil olunur.
