Təbiətin ümidinə
Milli Hidrometeorologiya Xidmətinin mayın 15-də yaydığı bilgidə ölkədə hava şəraitinin yağışlı keçdiyi, bəzi yerlərdə leysan xarakterli intensiv olduğu qeyd edilib, bölgələrdə düşən yağıntının miqdarı aylıq normanın 29-208 faizi arasında göstərilib.
Novator.az-ın məlumatına görə, iqtisadçı alim, Azərbaycan Demokratiya və Rifah Partiyasının sədri Qubad İbadoğlu bununla bağlı replika yayıb: “Kənd təsərrüfatı ilə məşğul olanların, fərdi sahibkarların, fermerlərin bəxti gətirdi, may yağışı onları suvarma ehtiyacları və xərclərindən xilas etdi. Yaxşı ki, aqrar rayonlara bol yağış yağdı, yoxsa yerli hakimiyyətlərin suvarma siyasəti kəndlilərin əziyyətini bu mövsüm də əllərində qoyacaqdı. Gör təsərrüfatların su təchizatında vəziyyət necədir ki, kəndlilər yağışın ümidinə qalıb.
Amma bir yağışla kəndlilərin problemləri həll olunmur, yerlərdə gübrə, pestisid və ziyanvericilərə qarşı istifadə olunan dərmanların çatışmazlığı var, fermerlərə subsidiya tam verilmir. Görəsən, təzə təyin olunmuş kənd təsərrüfatı naziri bu problemlər barədə nə düşünür?”
Aprelin 4-də Ali Məhkəmənin üzvü və sədri təyin olunan İnam Kərimov həmin gün kənd təsərrüfatı naziri vəzifəsindən azad edilib. Aprelin 14-də Məcnun Məmmədov kənd təsərrüfatı naziri təyin olunub.
1983-cü il təvəllüdlü Məcnun Məmmədov Azərbaycan Dövlət İqtisad Universitetini mühasibat uçotu və audit ixtisası (bakalavr), Pakistanın Lahor Universitetini biznesin təşkili və idarə edilməsi ixtisası (magistr) ilə bitirib.
“Deloitte & Touche” LLC-də məsləhətçi postu tutub, “AER” MMC-də çalışıb, “Modern Group of Companies” MMC-nin direktoru və İdarə Heyətinin üzvü, “PMD Group” MMC-nin direktoru, icraçı direktorunun birinci müavini, “Agro Food İnvestments” MMC-nin İdarə Heyətinin sədri, baş icraçı direktoru olub.
