“Avroviziya 2023”də İsveç möhürü
“Avroviziya 2023” mahnı müsabiqəsi İsveç təmsilçisi Lorinin (Zeynəb Nora Təlhavi) qələbəsi ilə başa çatıb. O, Böyük Britaniyanın Liverpul şəhərində keçirilən yarışın 13 may finalında tamaşaçılardan və münsiflərdən 583 xal alaraq rəqiblərini üstələyib.
Novator.az bildirir ki, 1983-cü il təvəllüdlü, Mərakeş əsilli Lorin Bakıda keçirilmiş “Avroviziya 2012”nin də qalibidir.
İctimai teleradioları bir araya gətirən Avropa Yayım Birliyinin 1956-cı ildən keçirdiyi “Avroviziya” yarışında İrlandiya və İsveç 7, Böyük Britaniya, Fransa, Lüksemburq və Niderland 5, İsrail 4, Danimarka, İtaliya, Norveç və Ukrayna 3, Almaniya, Avstriya, İspaniya və İsveçrə 2, Azərbaycan, Belçika, Estoniya, Finlandiya, Latviya, Monako, Portuqaliya, Rusiya, Serbiya, Türkiyə, Yuqoslaviya və Yunanıstan 1 dəfə qalib olub.
1969-cu ildə qələbə eyni vaxtda dörd ölkəyə (Böyük Britaniya, Fransa, İspaniya və Niderland) verilib, buna görə 67 dəfə keçirilmiş yarışın 70 qalibi var.
Azərbaycan 13 yarışda finala çıxıb. 2008-ci ildə Elnur Hüseynov və Samir Cavadzadə 8-ci yeri, 2009-cu ildə Aysel Teymurzadə və Araş 3-cü yeri, 2010-cu ildə Səfurə Əlizadə 5-ci yeri, 2011-ci ildə Nigar Camal və Eldar Qasımov 1-ci yeri, 2012-ci ildə Səbinə Babayeva 4-cü yeri, 2013-cü ildə Fərid Məmmədov 2-ci yeri, 2014-cü ildə Dilarə Kazımova 22-ci yeri, 2015-ci ildə Elnur Hüseynov 12-ci yeri, 2016-cı ildə Səmra Rəhimli 17-ci yeri, 2017-ci ildə Diana Hacıyeva 14-cü yeri, 2019-cu ildə Çingiz Mustafayev 8-ci yeri, 2021-ci ildə Samirə Əfəndi 20-ci yeri, 2022-ci ildə Nadir Rüstəmli 16-cı yeri tutub.
2018-ci ildə Aysel Məmmədova, 2023-cü ildə Tural və Turan Bağmanovlar yarımfinalda ələniblər.
