“Qarabağ”10-cu dəfə ölkə çempionu oldu
Mayın 13-ü Azərbaycanın milli futbol çempionatında 2022-2023 mövsümünün qalibi müəyyənləşib. Novator.az bildirir ki, sona iki tur qalmış əlçatmaz olan “Qarabağ” çempionluğu təmin edib. Bu, komandanın 10-cu zəfəridir.
Mövsümün gümüş medalları “Sabah”a, bürünc medalları “Neftçi”yə qismət olur.
1992-ci ildən başlayaraq Azərbaycan milli çempionatında daha 7 komanda qızıl medallara sahib çıxıb: “Neftçi” 9, “Kəpəz” 3, “Şəmkir”, “Bakı” və “İnter” (indiki “Şamaxı”) 2, “Turan” (Tovuz) və “Xəzər Lənkəran” 1 dəfə çempion olub.
Əsası 1951-ci ildə Ağdam şəhərində qoyulan “Qarabağ” komandası 1977-ci ilədək “Məhsul”, 1982-ci ilədək “Şəfəq”, 1988-ci ilədək “Kooperator” adı daşıyıb. 1 dəfə Azərbaycan SSR-in çempionu olub, 7 dəfə Azərbaycan kubokunu qazanıb.
