Türkiyə inamı
Azərbaycan Demokratiya və Rifah Partiyasının sədri Qubad İbadoğlu Türkiyədə mayın 14-də keçiriləcək parlament və prezident seçkilərindən yazıb: “Türkiyədə gərginlikdir, seçkilərin necə sonuclanması hər kəsi maraqlandırır. Azərbaycanda əksəriyyət “Ərdoğan seçkidə uduzsa da, getməyəcək” deyə düşünür, onların fikrincə, günahları və cinayətləri olanların hakimiyyətdən dinc getməsi variantı yoxdur. Məncə, Süleyman Dəmirəli (1965-1993-cü illər arasında 7 dəfə baş nazir olub, 1993-2000-ci illərdə prezident postunu tutub, 2015-ci ildə vəfat edib – red.) dəfələrlə hakimiyyətdən yola salmış Türkiyə xalqı bu işin də öhdəsindən layiqincə gələcək.
Türkiyəlilərin bu seçki kampaniyası dövründə necə siyasi yetkin xalq olduğunu gördük. Onların yanaşması ilə azərbaycanlıların yanaşması arasında xeyli fərq var. Bir millət olmağımıza baxmayaraq təfəkkür fərqimiz böyükdür, həm də Türkiyədə demokratik institutlar işləyir.
İnanıram ki, Türkiyədə toplum bu işin öhdəsindən də layiqincə gələcək, 14 may seçkiləri xalqın iradəsi havasında sonuclanacaq, ölkə yeni kurs və strategiya ilə davamlı inkişaf yoluna qədəm qoyacaq”.
Novator.az bildirir ki, Türkiyə seçkilərində əsas rəqabət Xalq və Millət ittifaqları arasında gedir.
Xalq ittifaqında Ədalət və İnkişaf Partiyası, Milliyyətçi Hərəkat Partiyası, Böyük Birlik Partiyası, Yenidən Rifah Partiyası birləşib.
Millət ittifaqında Cümhuriyyət Xalq Partiyası, Yaxşı Partiya, Səadət Partiyası, Demokrat Partiyası, Gələcək Partiyası, Demokratiya və Sıçrayış Partiyası bir araya gəlib.
600 nəfərlik parlamentə ölkə üzrə etibarlı səslərin azı 7 faizini qazanan partiya düşə bilər. İttifaqlarda bir partiyanın həmin həddə çatması kifayətdir.
Dövlət başçısı Rəcəb Teyyub Ərdoğan Xalq ittifaqının prezidentliyə namizədidir.
2001-ci ildə yaradılmış Ədalət və İnkişaf Partiyasına liderlik edən Rəcəb Teyyub Ərdoğan 2003-cü ildən baş nazir olub, 2014-cü ildə prezident seçilib. 2017-ci ildə Türkiyədə prezident idarə üsuluna keçidi nəzərdə tutan konstitusiya referendumu olub, 2018-ci ildə Rəcəb Teyyub Ərdoğan yenidən prezident postuna mandat alaraq həm də hökumət başçısı səlahiyyətlərinə yiyələnib.
Türkiyəni parlament idarə üsuluna qaytarmaq istəyən Millət ittifaqı prezident seçkisinə Kamal Kılıçdaroğlunun namizədliyi ilə gedir.
Kamal Kılıçdaroğlu 2002-ci ildən parlamentin – Türkiyə Böyük Millət Məclisinin deputatıdır. 2010-cu ildən Cümhuriyyət Xalq Partiyasına sədrlik edir.
İlk turda prezident seçilmək üçün etibarlı səslərin 50 faizindən çoxunu almaq tələb olunur, əks halda ən çox səs yığmış iki namizəd ikinci tura (28 may) çıxır.
Türkiyədə seçki marafonu, ilkin iddiaçılar
Türkiyə prezidentliyinə namizədlər
Türkiyə: dördlüyün yolu açıldı
Seçki yarışında hansı qurumlar var?
Türkiyədə yolayrıcı (Azərbaycandan baxış)
Türkiyə: bir partiya seçkidən çəkildi
Prezident seçkisinin bülleteni
Türkiyə: neçə nəfər səs verə bilər?
Türkiyə parlamentinə rəsmi iddiaçılar
Türkiyə: partiyaların namizəd dairəsi
Xaricdəki Türkiyə nə vaxt səs verir?
Sosial Tədqiqatlar Mərkəzi: Azərbaycan Ərdoğanı seçir
Qoşa seçki: sorğular nə göstərir?
