Birinci prezidentin doğum günü
Mayın 12-si birinci prezident Ayaz Mütəllibovun doğum günüdür.
Novator.az bildirir ki, 1938-ci ildə Bakıda doğulan Ayaz Mütəllibov indiki Azərbaycan Dövlət Neft və Sənaye Universitetini bitirib.
Azərbaycan Elmi Tədqiqat Hidrotexnika və Meliorasiya İnstitutunda böyük texnik, Bakı Məişət Elektrik Cihazları Zavodunda usta, mühəndis, şöbə rəisi, baş konstruktor və baş mühəndis vəzifələrində çalışıb, Bakı Soyuducular Zavodunun direktoru, “Bakelektroməişətmaş” İstehsalat Birliyinin baş direktoru, Nərimanov Rayon Partiya Komitəsinin ikinci katibi, yerli sənaye naziri, Nazirlər Soveti sədrinin müavini və Dövlət Plan Komitəsinin sədri, Nazirlər Sovetinin sədri olub.
1990-cı ilin yanvarında Azərbaycan Kommunist Partiyası Mərkəzi Komitəsinin birinci katibi seçilən Ayaz Mütəllibov respublikaya rəhbərlik edib, mayda parlamentin qərarı ilə yeni təsis olunan prezident vəzifəsinə gətirilib, 1991-ci ilin ümumxalq seçkisində eyni posta mandat alıb.
1992-ci il martın 6-da istefa verən Ayaz Mütəllibov mayın 14-də parlamentin qərarı ilə vəzifəyə qaytarılıb, amma ertəsi gün ölkəni tərk edərək Rusiyanın paytaxtı Moskvaya sığınıb.
2012-ci ildə Ayaz Mütəllibov vətənə dönərək Bakıda məskunlaşıb.
2022-ci il martın 27-də vəfat edən Ayaz Mütəllibov Bakının Fəxri xiyabanında dəfn olunub.
