Avropa Məhkəməsinin Azərbaycan cərimələri
Mayın 11-də Avropa İnsan Hüquqları Məhkəməsi Azərbaycandan şikayətlər üzrə qərardadlar elan edib.
Aihmaz.org xəbər verir ki, Fatma Əsgərovanın şikayətində Avropa İnsan Hüquqları Konvensiyası ilə verilmiş mülkiyyət hüququnun pozulduğu iddia olunub. Ərizəyə əsasən, Bakı Şəhər İcra Hakimiyyəti vətəndaşın əmlakını özgəninkiləşdirib, ona təzminat ödəməyib, yerli məhkəmələrdə çəkişmələr nəticəsiz qalıb.
Dövlətlə anlaşmaya görə, Fatma Əsgərova 9790 avro təzminat almalıdır.
5 ərizəçi məhkəməyə qədər həbsdə əsassız saxlandıqlarını iddia ediblər. Qərardada görə, dövlət dörd ərizəçinin hər birinə 3500 avro, bir ərizəçiyə 6800 avro təzminat ödəməlidir.
Yaşar Hacıyev və Firudin Zeynalov azadlıq və toxunulmazlıq hüququnun pozuntusu məsələsini qaldırıblar, məhkəməyə qədər həbsdə saxlanmalarının əsassız olduğunu iddia ediblər.
Qərardada görə, dövlət Yaşar Hacıyevə 4400 avro, Firudin Zeynalova 4700 avro təzminat ödəməlidir.
Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarətə məsuldur.
Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin təsir dairəsindədir.
