Şuşadan müraciət
Prezident İlham Əliyev mayın 10-da Şuşa şəhərindən xalqa müraciət edib. Televiziya ilə yayılan müraciət mərhum prezident Heydər Əliyevin 100 illiyi ilə bağlıdır.
Novator.az bildirir ki, Heydər Əliyev 1923-cü il mayın 10-u Naxçıvan şəhərində doğulub. 1939-cu ildə Naxçıvan Pedaqoji Texnikumunu bitirib, sonra Azərbaycan Sənaye İnstitutunun memarlıq fakültəsində oxuyub, 1941-ci ildə başlanan Almaniya-SSRİ müharibəsinə görə təhsilini yarımçıq kəsib.
1941-ci ildən Heydər Əliyev Naxçıvan Xalq Daxili İşlər Komissarlığında və Xalq Komissarları Sovetində çalışıb. 1944-cü ildə dövlət təhlükəsizliyi orqanlarında işə göndərilib. 1965-ci ildən Azərbaycan Dövlət Təhlükəsizliyi Komitəsi sədrinin müavini, 1967-ci ildən sədri vəzifəsində işləyib, general-mayor rütbəsinə qədər yüksəlib. Həmin illərdə o, Leninqrad şəhərində (indiki Sankt-Peterburq) xüsusi ali təhsil alıb, 1957-ci ildə isə Azərbaycan Dövlət Universitetinin tarix fakültəsini bitirib.
1969-cu il iyulun 14-də Heydər Əliyev Azərbaycan Kommunist Partiyası Mərkəzi Komitəsinin birinci katibi seçilərək respublika rəhbəri olub. 1982-ci ilin dekabrında Sovet İttifaqı Kommunist Partiyası Mərkəzi Komitəsi Siyasi Bürosunun üzvü seçilib, SSRİ Nazirlər Soveti sədrinin birinci müavini vəzifəsinə təyin edilib.
1987-ci ilin oktyabrında vəzifədən gedib.
1990-cı ildə Heydər Əliyev Azərbaycan parlamentinin və Naxçıvan Ali Sovetinin deputatı seçilib, 1991-ci ildə Kommunist Partiyasını tərk edib. 1991-1993-cü illərdə Naxçıvan Muxtar Respublikası Ali Məclisinin sədri olub. 1992-ci ildə Yeni Azərbaycan Partiyasının sədri seçilib.
Heydər Əliyev 1993-cü il iyunun 15-də Azərbaycan Ali Sovetinin sədri seçilib, iyunun 24-də Milli Məclisin qərarı ilə prezident səlahiyyətlərini həyata keçirməyə başlayıb.
1993-cü və 1998-ci illərdə Azərbaycan prezidenti seçilib.
2003-cü il dekabrın 12-də vəfat edib.
