5 milyon dollarlıq məğlubiyyət
ABŞ-ın sabiq prezidenti Donald Tramp yazıçı və jurnalist Cin Kerrolla 5 milyon dollar təzminat ödəməlidir. Novator.az saytı CNN-ə istinadla bildirir ki, Nyu-York şəhərində federal məhkəmə mayın 9-da belə qərar verib.
Donald Tramp Cin Kerrollu seksual qısnamada və onu böhtançı adlandıraraq işgüzar nüfuzuna xələl gətirməkdə təqsirli bilinib.
Cin Kerroll 2019-cu ildə dərc olunmuş kitabında Donald Trampın 1996-cı ildə onu zorladığını iddia etmiş, Donald Tramp jurnalisti böhtanda günahlandırmış, bundan sonra yazar məhkəmə iddiası qaldırmış, proses bu ilin aprelində başlamışdı.
Nyu-York ştatının Ali Məhkəməsi bu il aprelin 4-də Donald Trampa 2016-cı ilin prezident seçkisi kampaniyasının maliyyələşməsi qaydalarını pozaraq 130 min dollar qanunsuz ödəniş etmək ittihamı irəli sürüb. İddiaya görə, həmin pul bir vaxt Donald Trampla münasibətləri olmuş aktrisa Stefani Kiliffordsa (Stormi Deniels) susması müqabilində verilib.
1946-cı il təvəllüdlü Donald Tramp Pensilvaniya Universitetinin Uorton Biznes Məktəbini bitirib. Uzun illər tikinti biznesi ilə məşğul olub, 1999-cu ildə Respublikaçılar Partiyasına qoşulub.
2016-cı ilin prezident seçkisində Respublikaçılar Partiyasının namizədi olan Donald Tramp Demokratlar Partiyasından Hillari Klintonu məğlub edib, 2017-ci il yanvarın 20-də dövlət başçısı səlahiyyətlərinin icrasına başlayıb.
2020-ci ilin prezident seçkisində Donald Tramp Demokratlar Partiyasının namizədi Cozef Baydenə uduzub.
Donald Tramp 2024-cü ilin prezident seçkisində namizəd olmaq istəyir.
Mənbə: CNN.com
