Özbəkistan növbədənkənar prezident seçkisinə gedir
İyulun 9-u Özbəkistanda növbədənkənar prezident seçkisi keçiriləcək. Novator.az-ın məlumatına görə, dövlət başçısı Şövkət Mirziyayev mayın 8-də belə fərman verib.
Fərman konstitusiyaya dəyişikliklər referendumunun nəticələrindən irəli gəlir.
Referendumun erkən səsverməsi 19-26, əsas səsverməsi 30 apreldə keçirilib. Ana qanunda əsas yeniliklərdən biri prezidentin səlahiyyət müddətinin 5 ildən 7 ilə qaldırılması, indiki dövlət başçısına yenidən seçilmək imkanı yaradılması, ona növbədənkənar prezident seçkisi təyin etmək hüququ verilməsidir.
1957-ci il təvəllüdlü Şövkət Mirziyayev 2003-cı il dekabrın 12-dən baş nazir olub, 2016-cı il sentyabrın 8-dən prezident səlahiyyətlərini icra edib, dekabrın 4-də prezident seçilib.
Şövkət Mirziyayev 2021-ci ildə erkən səsverməsi 14-20 oktyabr arası, əsas səsverməsi oktyabrın 24-də keçirilmiş prezident seçkisində də qalib gəlib.
