İctimai Teleradio: Yayım Şurasının sədri dəyişir
Azərbaycan Milli Elmlər Akademiyasının İctimai Televiziya və Radio Yayımları Şirkətinin Yayım Şurasındakı təmsilçisi dəyişib: Milli Məclisin 2 may iclasında Teymur Kərimli şura üzvü seçilərək Muxtar İmanovu əvəzləyib.
Novator.az bildirir ki, Muxtar İmanov 2017-ci ildən şura sədri idi və həmin kürsü avtomatik boşalır.
2 may iclasında Azərbaycan Həmkarlar İttifaqları Konfederasiyasından Həsən Cəfərov və Azərbaycan Mətbuat Şurasından Azər Həsrət yenidən şura üzvü seçiliblər.
9 üzvü olan Yayım Şurasının İctimai Televiziya və Radio Yayımları Şirkətinin baş direktorunu seçmək səlahiyyəti var.
Azərbaycan Həmkarlar İttifaqları Konfederasiyası, Milli Elmlər Akademiyası, Mətbuat Şurasının irəli sürdüyü namizədləri parlament 6 il, Sahibkarlar Şurası, gənclər təşkilatları, qadın cəmiyyətlərinin irəli sürdüyü namizədləri 4 il, idman federasiyaları, dini konfessiyalar, yaradıcılıq təşkilatlarının irəli sürdüyü namizədləri 2 il müddətinə seçir.
İctimai Televiziya və Radio Yayımları Şirkəti 2005-ci ildən fəaliyyət göstərir. 2005-2013-cü illərdə quruma İsmayıl Ömərov, 2013-2018-ci illərdə Cəmil Quliyev baş direktorluq edib, 2018-ci ildən Balakişi Qasımov baş direktordur.
Baş direktorun səlahiyyət müddəti 4 ildir.
2005-2017-ci illərdə Yayım Şurasına Cahangir Məmmədli sədrlik edib.
