Vahid Əhmədova töhmət verildi
Milli Məclisin İntizam Komissiyası aprelin 28-də deputat Vahid Əhmədovla bağlı məsələyə baxaraq ona töhmət verib. Vahid Əhmədov bloqçu Mehman Hüseynova müsahibəsində etik davranış qaydalarını pozaraq Milli Məclisin fəaliyyətinə kölgə salmaqda qınanıb.
İntizam Komissiyasının üzvləri bu şəxslərdir: Eldar İbrahimov (Yeni Azərbaycan Partiyası) – sədr, Fəzail Ağamalı (Ana Vətən Partiyası) – sədr müavini, Nurlan Həsənov, Afət Həsənova, Məlahət İbrahimqızı, Nəsib Məhəməliyev, Hikmət Məmmədov, Məşhur Məmmədov, Nizami Səfərov (hamısı Yeni Azərbaycan Partiyası), Səttar Möhbalıyev, Madər Musayev (hər ikisi partiyasız).
Vahid Əhmədov 1947-ci il aprelin 2-də doğulub. Texnika doktorudur.
Üç zavodda məsul vəzifələr tutub, iki zavodun direktoru, “Bakneftmaş” İstehsalat Birliyinin baş direktoru, baş nazirin müavini, birinci müavini olub. 1990-cı ildə Ali Sovetin, 2005, 2010, 2015, 2020-ci illərdə Milli Məclisin deputatı seçilib.
Parlamentdə 52 saylı Quba seçki dairəsini təmsil edir.
“Şöhrət” ordeni laureatı, əməkdar mühəndisdir.
