Kabinetin gənci
Novator.az Nazirlər Kabinetinin ən gənc üzvü – kənd təsərrüfatı naziri Məcnun Məmmədovun bioqrafiyasına nəzər salıb.
Məcnun Qadir oğlu Məmmədov 1983-cü il sentyabrın 15-də Zəngilan rayonunun Mincivan qəsəbəsində doğulub.
Azərbaycan Dövlət İqtisad Universitetini mühasibat uçotu və audit ixtisası (bakalavr), Pakistanın Lahor Universitetini biznesin təşkili və idarə edilməsi ixtisası (magistr) ilə bitirib.
2006-2007-ci illərdə həqiqi hərbi xidmət keçib.
“Deloitte & Touche” LLC-də məsləhətçi postu tutub, “AER” MMC-də çalışıb, “Modern Group of Companies” MMC-nin direktoru və İdarə Heyətinin üzvü, “PMD Group” MMC-nin direktoru, icraçı direktorunun birinci müavini, “Agro Food İnvestments” MMC-nin İdarə Heyətinin sədri, baş icraçı direktoru olub.
Kənd təsərrüfatı naziri vəzifəsinə prezident İlham Əliyevin 14 aprel 2023-cü il sərəncamı ilə təyin edilib.
İngilis, türk və rus dillərini bilir.
Evlidir, 2 övladı var.
Kənd Təsərrüfatı Nazirliyi 1918-ci ildə Əkinçilik və Əmək Nazirliyi adı ilə yaradılıb, həmin il Dövlət Əmlakı və Əkinçilik Nazirliyinə çevrilib. 1920-ci ildən Dövlət Torpaq Komissarlığı, 1946-cı ildə əvvəl Əkinçilik Nazirliyi, sonra Kənd Təsərrüfatı Nazirliyi adı daşıyıb. 1985-ci ildə bir çox qurumla birləşdirilən Kənd Təsərrüfatı Nazirliyi Dövlət Aqrar Sənaye Komitəsinə çevrilib. 1992-ci ildə Kənd Təsərrüfatı və Ərzaq Nazirliyi yaradılıb, 1993-cü ildə yenidən Kənd Təsərrüfatı Nazirliyi qurulub.
