Avropa Məhkəməsinin Azərbaycan qərarları
Avropa İnsan Hüquqları Məhkəməsi aprelin 27-də Azərbaycandan şikayətlər üzrə yeni qərarlar elan edib. Hüquqşünas Xalid Ağalıyev bildirir ki, Şəhla Abbasəliyevanın şikayəti 2011-ci ildə “Gündəlik Bakı” qəzetində dərc edilmiş bir neçə yazı ilə bağlı olub. Həmin yazılarda Qazax Şəhər Poliklinikasının baş həkimi Şəhla Abbasəliyevanın 1995-ci ildə dövlət çevrilişinə cəhd və başqa ittihamlarla tutulmuş Elçin Əmiraslanovun (hazırda ömürlük həbs cəzası çəkir) bacısı olduğu vurğulanıb. Bir qədər sonra Şəhla Abbasəliyeva baş həkim vəzifəsindən çıxarılıb. O, işəgötürənə və qəzetə qarşı məhkəmə iddiası qaldırıb, ancaq prosesləri uduzub, Avropa Məhkəməsinə üz tutmağa məcbur olub.
Avropa Məhkəməsi ərizəçinin Avropa İnsan Hüquqları Konvensiyası ilə qorunan şəxsi həyata hörmət hüququnun pozulduğu qənaətinə gəlib. Qərara əsasən, Azərbaycan dövləti şikayətçiyə 4500 avro təzminat ödəməlidir.
Dursun Əliyev polis əməkdaşı olub, narkotik alveri ittihamı ilə cinayət məsuliyyətinə alınıb. Avropa Məhkəməsi qanunsuz məhkum olunduğunu iddia edən şikayətçinin ədalətli məhkəmə araşdırması hüququnun pozulduğu qənaətinə gələrək dövlətin ona 5 min avro təzminat ödəməsinə qərar verib.
Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarətə məsuldur.
Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin təsir dairəsindədir.
